ହସ୍ପିଟାଲ ବେଡ଼ ରେ ଚାର୍ଟାର୍ଡ ଆକାଉଣ୍ଟାଣ୍ଟ ପରୀକ୍ଷା ପାଇଁ ପ୍ରସ୍ତୁତି , ପ୍ରଶଂସା କଲେ ଜିଲ୍ଲାପାଳ

ବ୍ରହ୍ମପୁର ( ୨୮/୦୪,ପିପିଏଲ୍ ନ୍ୟୁଜ୍ ) : ଦୃଢ ଇଛାଶକ୍ତି ଆଗରେ ହାର ମାନିଯାଏ ସବୁ ପ୍ରତିବନ୍ଧକ । ମନର ଦୃଢ ସଂକଳ୍ପ, ନିଷ୍ଠା ଓ ଇଛାଶକ୍ତି ଥିଲେ ସବୁ ସଫଳତା ହାସଲ କରିହୁଏ । ଆଉ ଏହାର ଜ୍ୱଳନ୍ତ ଉଦାହରଣ ଦେଖିବାକୁ ମିଳିଛି ଗଞ୍ଜାମ ଜିଲ୍ଲାରେ । ସାରା ଦେଶ କରୋନାର ଭୟାବହତା ଓ କରୁଣରୂପ ଦେଖୁଥିବା ବେଳେ ଗଞ୍ଜାମରୁ ଆସିଛି ଏମିତି କିଛି ଦୃଶ୍ୟ ଯାହା ଆପଣଙ୍କୁ ମନବଳ ବଢାଇଦେବ ନିଶ୍ଚୟ । କରୋନା ସଂକ୍ରମିତ ହୋଇ ଜଣେ ଯୁବକ ଚିକିତ୍ସିତ ହେଉଛନ୍ତି । ଲୋକେ ଆତଙ୍କିତ ଥିବାବେଳେ ଏହି ଯୁବକ ଜଣକ କିନ୍ତୁ ବିଚଳିତ ନୁହଁନ୍ତି । ବ୍ରହ୍ମପୁର ଏମକେସିଜି କୋଭିଡ ହସ୍ପିଟାଲରେ ବେଡରେ ଥାଇ ମେ’ ମାସ ରେ ହେବାକୁ ଥିବା ଚାଟାର୍ଡ ଆକାଉଣ୍ଟାଣ୍ଟ ପରୀକ୍ଷା ପାଇଁ ଚଳାଇଛନ୍ତି ପ୍ରସ୍ତୁତି । ମାନସିକ ଅବସାଦରୁ ବାହାରି କରୋନାରେ ବିଚଳିତ ନହୋଇ ସେ ଗଢୁଛନ୍ତି ଭବିଷ୍ୟତ । ଏହି ସମୟରେ ମେଡିକାଲ ପରିଦର୍ଶନରେ ଆସିଥିବା ଗଞ୍ଜାମ ଜିଲ୍ଲାପାଳ ବିଜୟ ଅମୃତ କୁଲାଙ୍ଗ ଯୁବକଙ୍କୁ ଭେଟି ତାଙ୍କ ଧୈର୍ଯ୍ୟକୁ ସାବାସୀ ଦେଇଛନ୍ତି । ଏହି ଦୃଶ୍ୟକୁ ନିଜ ମୋବାଇଲରେ କଏଦ କରି ଟୁଇଟ କରିଛନ୍ତି ଗଞ୍ଜାମ ଜିଲ୍ଲାପାଳ । ଯୁବକଙ୍କ ଏହି ସମର୍ପଣ ଭାବକୁ ଦେଖି ସେ କହିଛନ୍ତି କି ତୁମ ସମର୍ପଣଭାବ ତୁମ ଯନ୍ତଣାକୁ ଦୂରେଇ ଦେବ ନିଶ୍ଚୟ । ଏହାସହ ସେ ଯୁବକଙ୍କୁ ସାବାସୀ ଦେବା ସହ ଆଗମୀ ଭବିଷ୍ୟତ ପାଇଁ ଶୁଭେଚ୍ଛା ଜଣାଇଛନ୍ତି ।

ରିପୋର୍ଟ – ଶୁଭ୍ରଜ୍ୟୋତି

Leave a Reply

Your email address will not be published. Required fields are marked *